इमर्जिङ टिम्स एसिया कपको खेल तालिका सार्वजनिक
नेपालखोज
२०८० असार २२ गते ६:२३
काठमाडाैं । दुई सातापछि श्रीलंकामा हुने एसीसी इमर्जिङ टिम्स एसिया कपको खेल तालिका सार्वजनिक भएको छ जस अनुसार नेपालले आफ्नो पहिलो खेल पाकिस्तान ‘ए’सँग खेल्नेछ । यो तालिका एसियन क्रिकेट काउन्सिल (एसीसी)ले सार्वजनिक गरेको हो ।
एसीसी इमर्जिङ टिम्स एसिया कप यहि असार २८ गते बिहिबारदेखि साउन ७ गते आइतबारसम्म श्रीलंकामा संचालन हुनेछ । एसीसीद्वारा जारी तालिका अनुसार नेपाल समूह ‘बी’मा छ । यो समूहमा नेपालसँगै यूएई, पाकिस्तान तथा भारत ‘ए’ छन् । त्यस्तै समूह ‘ए’मा श्रीलंका, बंगलादेश, अफगानिस्तान र ओमान छन् । एसीसी इमर्जिङ टिम्स एसिया कपमा सहभागि पाँच वटा टेस्ट देसबाट यू २३ को टिम सहभागी हुनेछ भने नेपाल सहितका एसिएट देसले आफ्नो पहिलो रोजाईका खेलाडी सहभागी गराउनेछन् ।
यो प्रतियोगिता अन्तर्गत नेपालले असार २९ गते (१४ जुलाई) पाकिस्तान ‘ए’सँग प्रतिस्पर्धा गर्नेछ । नेपालको दोस्रो खेल साउन १ गते सोमबार (१७ जुलाई)मा भारत ‘ए’सँग हुनेछ । नेपालको तेस्रो खेल साउन ३ गते बुधबार (१९ जुलाई) युएईसँग छ । यो प्रतियोगिताको सेमिफाइनल साउन ५ गते शुक्रबार (२१ जुलाई) हुनेछ भने फाइनल साउन ६ गते शनिबार र (२२ जुलाई ) हुनेछ ।
एसीसीले एसोसिएट देसहरुलाई म्याच एक्सपोजर दिन इमर्जिङ टिम्स एसिया कपको आयोजना गर्दै आएको छ । नेपालले इमर्जिङ टिम्स एसिया कपका लागि अन्तिम टिमको घोषणा गर्न बाँकी छ भने भारत र पाकिस्तानले यसको घोषणा गरिसकेका छन् । नेपाल दुई महिना अघि एसिसी प्रिमियर कपको उपाधि जित्दै इमर्जिङ कपमा पुगेको थियो ।
सम्बन्धित
