कलैया । नेकपा (एकीकृत समाजवादी)का अध्यक्ष माधवकुमार नेपालले बारा २ लाई मात्रै नभएर सिङ्गो देशलाई नै उपेन्द्र यादवको नेतृत्व आवश्यक रहेको बताएका छन् ।
देश र संसदलाई चाहिएको नेतालाई अत्यधिक मत दिएर विजयी गराई पठाउन बारा २ का मतदातासँग आग्रह गर्दै एसका अध्यक्ष नेपालले जसपा अध्यक्ष उपेन्द्र यादवको जित निश्चित भएको बताएका हुन् ।
नेपाली राजनीतिक परिवर्तनका लागि महत्त्वपूर्ण मानिएको संघीय लोकतान्त्रिक गणतन्त्रका लागि मधेश विद्रोहको स्थान उच्च रहनेभन्दै नेपालले मधेश विद्रोह र पहिचान, संघीयता आन्दोलनलाई संस्थागत गर्न र परिवर्तन सहितको एजेण्डाले देश र प्रदेशहरुको समयानुकूल विकास गर्न जसपा अध्यक्ष यादवको संसदमा उपस्थिति अपरिहार्य रहेको जिकिर गरे ।
बारा २ मा सत्ता गठबन्धनका उम्मेदवार समेत रहेका जसपा अध्यक्ष यादवको पक्षमा माहोल बनाउन नेपाल बुधबार बाराको गौर आएका थिए ।
बारा २ को चुनावी मैदानमा रहेका यादवलाई भेटेपछि नेपालले गठबन्धनको जित सुनिश्चित रहेको दावीसमेत गरे ।
गठबन्धनका दलहरूलाई एकमत भएर आफ्ना उम्मेदवारलाई विजयी बनाउन आग्रह गर्दै अध्यक्ष नेपालले भने – ‘हल्ला गर्नेका पछिलाग्ने होइन, जनताको लागि लड्ने र अधिकर दिलाउने नेतालाई विजयी गराउनुपर्छ ।‘
अध्यक्ष नेपालले बुधबार नै मधेश प्रदेशका मुख्यमन्त्री सरोज कुमार यादवसँग पनि भेट गरेका थिए । भेटका क्रममा मधेश सरकारका गतिविधि बारे छलफल भएको बताइएको छ ।
सत्ता गठबन्धनको आधिकारिक उम्मेदवार समेत रहेका जसपा अध्यक्ष यादवले गएको सोमबार बारा–२ बाट उम्मेदवारी दिएका थिए ।
अध्यक्ष यादवलाई नेपाली कांग्रेस, नेकपा माओवादी, नेकपा(एस) र लोकतान्त्रिक समाजवादी पार्टी(लोसपा) नेपालको समर्थन छ ।
अध्यक्ष यादवले चुनावी अभियानलाई अघि बढाउँदै कार्यकर्ता भेटघाट लगायतको कार्यक्रम थालेका छन् । बारा–२ सहित देशका तीन निर्वाचन क्षेत्रमा आगामी बैशाख १० मा उपचुनाव हुन लागेको छ ।
