राजविराज । अलग अलग माग राखेर विद्यार्थीहरु विरोधमा उत्रेपछि सप्तरीको राजविराजस्थित महेन्द्र विन्देश्वरी बहुमुखी क्याम्पसको मतगणना हुन सकेको छैन् ।
मंगलबार पनि विद्यार्थी संघसंगठनहरुले विभिन्न माग राखेर प्रदर्शन गरेका छन् । मतगणना गर्नको लागि भएको सर्वदलीय छलफल निष्कर्षविहीन सकिएको छ ।
राजनीतिक दलको प्रतिनिधि,स्थानीय प्रशासन र क्याम्पस प्रशासनबीचको वार्ता निष्कर्षविहिन सम्पन्न भएको हो । संयुक्त विद्यार्थी गठबन्धनले मतगणना गर्नुपर्ने माग राखेर धर्ना बसेका छन् भने नेविसंघ, अनेरास्ववियु, विद्यार्थी जनमतले निर्वाचन अधिकृत र प्रशासनको मिलोमतोमा धाँधलीपुर्ण चुनाव भएको भन्दै पुनः निर्वाचनको माग गर्दै बिरोधमा उत्रेका छन् । मंगलबार विभिन्न बिद्यार्थी सङ्गठनहरुले राजविराज कुनोलि सडकखण्ड अवरुद्ध गरेर प्रदर्शन समेत गरेका छन् । आइतबार भएको निर्वाचनमा कुल १ हजार ९१४ मतदातामध्ये ८२९ जनाले मतदान गरेका थिए । मतदान सम्पन्न भएपनि केही विद्यार्थी संगठनले मतदानमा धाँधली भएको आरोप लगाउँदै प्रदर्शन गरेका थिए ।
