जनकपुरधाम । मिथिला मध्यमा परिक्रमा बुधबार(आज) धनुषाधाम पुग्ने भएको छ । पर्वताबाट परिक्रमाको डोला बुधबार धनुषाधाम आइपुग्ने भएको छ । श्रद्धालु भक्तजन, साधुसन्तहरु धनुषाधामस्थित ऐतिहासिक पोखरीमा स्नान गरेर धनुष मन्दिरमा दर्शन पूजा गर्ने छन् । यसअघि मंगलबार महोत्तरीको कञ्चनवनबाट परिक्रमाको डोला पर्वता आइपुगेको थियो ।
मंगलबार बिहान परिक्रमा यात्री धनुषाको पर्वता आइपुगेको हो । कञ्चनवनबाट प्रस्थान गरेको परिक्रमा यात्रीको लागि क्षीरेश्वरनाथको महेन्द्रनगरमा निःशुल्क भोजन, खानेपानी लगायतको व्यवस्थापन गरिएको थियो ।
बुधबार धनुषाधाम, बिहीबार सतोषर, शुक्रबार औरही, शनिबार भारतको करुणा, आइतबार विशौल हुँदै सोमबार बिहान पुनः कल्याणेश्वर मठमा दर्शन गर्दै परिक्रमा यात्री सोमबार नै जनकपुरधाम आइपुग्ने छन् । मंगलबार बिहान अन्तगृह परिक्रमा गरेर १५ दिवसीय परिक्रमाको समापन गर्ने छन् ।
जनकपुरमा फागु पूर्णिमाको दिन होलीका दहनपश्चात अन्तरगृह परिक्रमा गरी मध्यमा परिक्रमा गरिन्छ ।
नेपाल र भारतको १ सय ३३ किलोमिटर पैदल यात्रा गर्ने परिक्रमाबासीहरु यस अवधिभरीको लागि आफ्नो गाँस, बास र कपासको व्यवस्था गरेर हिँड्छन् ।
फागुन ८ गते धनुषाको मिथिलाबिहारी नगरपालिकास्थित ठेरा कचुरी मठबाट भगवान राम र जनकपुरको अग्नीकुण्डबाट जानकीको डोलासहित परिक्रमा सुरु भएको थियो ।
परिक्रमाका सम्बन्धमा मिथिला महात्म्यमा चर्चा भएको पाइन्छ । मिथिला महात्म्य १८ औँ शताब्दीमा लेखिएको साधुसन्तहरु बताउँछन् । यस हिसाबले मिथिला मध्यमा परिक्रमा १८ औं शताब्दीभन्दा पहिले नै सुरू भएको अनुमान छ ।
परिक्रममा सहभागी हुँदा सुख, शान्ति र समृद्धि प्राप्त हुने जनविश्वास छ । चारधामको दर्शन गरे बराबरको फल प्राप्तीका लागि परिक्रममा सहभागी हुने गरेको साधुसन्तको भनाई छ ।
