जनकपुरधाम । १५ दिवसीय मिथिला मध्यमा परिक्रमामा सहभागी श्रद्धालु भक्तजनको सेवामा नेपाल–भारत खुला सीमा सम्वाद समूहले हेल्प डेस्क सञ्चालनलाई निरन्तरता दिएको छ ।
बुधबार परिक्रमा पुगेको स्थल भारतको गिरिजा स्थान(फुलहर) मा नेपाल–भारत खुला सीमा सम्वाद समूह मधुबनीद्वारा आयोजित हेल्प डेस्क कार्यक्रममा निःशुल्क स्वास्थ्य शिविर सञ्चालन गरिएको छ ।
समूहका मधुबनी जिल्ला अध्यक्ष डा.रोहित झाको अध्यक्षतामा निःशुल्क प्राथमिक उपचार सहित चिया र पानीको व्यवस्था गरिएको समूहका केन्द्रीय अध्यक्ष राजीव झाले जानकारी दिए ।
मधुबनीमा आयोजित हेल्प डेस्कमा डा.रोहित झा, अनिल भारती, उग्रनोश झा, डा.रामकृपाल महतो, कृष्णनन्द ठाकुर, देवेन्द्र झा, उदय झा, अरुण ठाकुर, गुड्डु झा लगायतले सेवा प्रदान गरेका छन् ।
यसअघि, मिथिला मध्यमा परिक्रमाको पहिलो दिन जनकपुरधामको हनुमानगढीमा साधुसन्त, महात्मा तथा श्रद्धालु भक्तजनहरुको सुबिधालाई ध्यानमा राखी कार्यालय सचिब कृष्ण कुमार साहको अध्यक्षतामा हेल्प डेस्क स्थापना गरिएको थियो । जसमा प्राथमिक उपचार सहित चिया र पानीको व्यवस्था गरिएको थियो ।
ओढ्ने र ओछ्याउन लत्ताकपडा नभएको साधुसन्तहरुका लागि कम्बल र झुल समेत बितरण गर्ने नेपाल–भारत खुला सीमा संबाद समूहले जनाए ।
