जनकपुरधाम । उपराष्ट्रपति नन्द बहादुर पुन सोमबार(आज) जनकपुर आउने भएका छन् । मधेश प्रदेश सरकारले जयनुद्ध दिवसको अवसरमा गर्न लागेको विशेष कार्यक्रममा सरिक हुनको लागि उपराष्ट्रपति पुन जनकपुर आउन लागेको धनुषाका प्रमुख जिल्ला अधिकारी का
शिराज दाहालले बताए ।
दाहालका अनुसार मधेश भवनको कभर्ड हलमा आयोजना हुन लागेको विशेष कार्यक्रमको लागि उपराष्ट्रपति पुन हेलिकप्टरले जनकपुर आउन लागेका हुन् । उक्त कार्यक्रममा सरिक भएर उपराष्ट्रपति पुन सोमबार नै काठमाण्डौ फर्किने कार्यक्रम रहेको छ ।
गृह तथा संचार मन्त्रालय मातहत रहेको मधेशी शहीद प्रतिष्ठानले जनयुद्ध दिवसको अवसरमा विशेष कार्यक्रम गर्न लागेको हो । जनयुद्ध दिवसको अवसरमा शहीद परिवारहरुलाई आर्थिक सहयोग प्रदान गर्ने तयारी छ । प्रदेशका ८ जिल्लाका ५ सय ४० जना शहीद परिवारलाई एक÷एक लाखको दरले आर्थिक सहयोग गर्ने तयारी रहेको प्रतिष्ठानले जनाएको छ । यता, संघीय सरकारले फागुन १ गते सोमबार(आज)जनयुद्ध दिवसका रूपमा सार्वजनिक बिदा दिने निर्णय गरेको छ ।
प्रधानमन्त्री तथा मन्त्रिपरिषद्को कार्यालय सिंहदरबारमा आइतबार बसेको मन्त्रिपरिषद्को बैठकले सो निर्णय गरेको हो । प्रधानमन्त्री पुष्पकमल दाहाल ‘प्रचण्ड’ को अध्यक्षतामा बसेको मन्त्रिपरिषद् बैठकले नेपालको राजनीतिक परिवर्तनमा जनयुद्धले पु¥याएको योगदानको कदर गर्दै सार्वजनिक बिदा दिने घोषणा गरेको हो ।
विसं २०५२ फागुन १ गतेदेखि सुरू भएको जनयुद्ध २०६३ मङ्सिर ५ गते विस्तृत शान्ति सम्झौतामा रूपान्तरण भएको थियो । त्यही जनयुद्धको जगमा नेपालमा राजनीतिक परिवर्तन सम्भव भएको थियो भने गणतन्त्र, सङ्घीय प्रणाली, समावेशी लोकतन्त्र, सामाजिक न्यायजस्ता उपलब्धि जनयुद्ध र जनआन्दोलनको बलमा नै स्थापित भएका थिए ।
जनयुद्धको नेतृत्वकर्ता पार्टी माओवादी केन्द्रले प्रत्येक वर्ष फागुन १ गतेलाई जनयुद्ध दिवसको रूपमा मनाउँदै आएको छ । परिवर्तनका पक्षमा भएका सबै आन्दोलन र क्रान्तिको सम्मानमा सरकारले सार्वजनिक बिदा दिने निर्णय लिएको हो । मधेश प्रदेशले वर्षको क्यालेण्डरमै जनयुद्ध दिवसको अवसरमा सार्वजनिक विदा समावेश गरिसकेको छ ।
