जनकपुरधाम । मधेश प्रदेशका नवनियुक्त अर्थमन्त्री संजय यादवले पदभार ग्रहण गर्दै सरकारको राजश्व वृद्धि गर्नको लागि कार्ययोजना बनाएर अगाडि बढ्न कर्मचारीहरुलाई निर्देशन दिएका छन् ।
जिम्मेवारी पाएको चार दिन पछि मन्त्रालयको कार्यभार सम्हाल्दै उनले प्रदेश सरकारको राजश्व वृद्धि गर्नको लागि कार्ययोजना बनाएर अघि बढ्न निर्देशन दिएका हुन् ।
गएको पुस २९ गते जनता समाजवादी पार्टी(जसपा)बाट बिनाविभागीय मन्त्रीको रुपमा पद तथा गोपनीयताको शपथ ग्रहण गरेका उनी गएको बुधबार मात्रै अर्थ मन्त्रालयको जिम्मेवारी पाएका थिए ।
मन्त्री यादव आइबार दिउँसो मन्त्रालय पुगेर पदभार ग्रहण गर्दै सरकारको राजश्व बृद्धि गर्नका लागि कर्मचारीलाई निर्देशन दिए ।
बजेटमा भएका प्रावधान अनुसार चालू खर्चलाई मितव्ययी बनाउँदै कटौति गर्ने र पूँजिगत खर्चलाई अभिवृद्धि गर्ने सम्बन्धमा पनि कार्ययोजना बनाउन निर्देशन दिएका हुन् ।
पुस २९ गते मुख्यमन्त्री सरोज कुमार यादवसँगै मन्त्री पदको शपथ ग्रहण गरेका नेकपा एमाले संसदीय दलका नेता सरोज कुमार यादवले गएको बुधबार नै भौतिक पूर्वाधार मन्त्रालयको जिम्मेवारी सम्हालेका थिए । उनीसँगै मन्त्री पदको शपथ लिएका जनमत पार्टीका बसन्त कुशवाहाले पनि बुधबार नै भुमि व्यवस्था, कृषि तथा सहकारी मन्त्रालयको जिम्मेवारी सम्हालिसकेका छन् । सुरुमा जनमतका कुशवाहाले सामाजिक विकास मन्त्रालय पाउने भनिए पनि कुशवाहाले भुमि व्यवस्था, कृषि तथा सहकारी मन्त्रालयको जिम्मेवारी सम्हालेका हुन् । ११ सदस्यीय मन्त्रीमण्डलमा अभैm सात मन्त्रालयमा मन्त्री नियुक्त गर्न बाँकी छ ।
आज मन्त्रिमण्डल विस्तार हुने
नवनियुक्त मुख्यमन्त्री सरोज कुमार यादवले सोमबार(आज) मन्त्रीमण्डल विस्तार गर्ने भएका छन् । मन्त्रिमण्डल विस्तार गर्नको लागि सत्ता साझेदार दलका नेताहरुसित आइतबार छलफल गरेका छन् । ११ सदस्यीय मन्त्रिमण्डलमा हालसम्म मुख्यमन्त्री यादवबाहेक तीन जना मन्त्रीको नियुक्ती भएको छ । सहमति अनुसार नेकपा एमाले, जनमत पार्टीलाई थप मन्त्रालय दिन लागिएको श्रोतले बताए । सरकारको नेतृत्व गरिरहेको जसपाले पनि थप मन्त्री नियुक्त गर्न लागेको श्रोतले बताए ।
