जनकपुरधाम । जोखिम मुल्यांकन र समुदायमा मानव आधारित बाढी पूर्व सूचना प्रणालीका लागि कमला नदी क्षेत्रमा सम्भाव्यता अध्ययनको लागि सरोकारबालाहरुसँगको छलफल गोष्ठी शुक्रबार जनकपुरमा सम्पन्न भएको छ । इसिमोड(आईसीआईएमओडी) को सहयोगमा सामूदायिक विकास तथा पैरबी मंच (सीडीएएफएन) नेपालले आयोजना गरेको कार्यक्रममा विज्ञहरुले बाढीका कारण पहाडभन्दा तराई क्षेत्र बढी जोखिममा रहेको बताए । वर्षाका कारण पहाडमा हुने भू–क्षयले तराईमा क्षति गर्छ । चुरे दोहनका कारण वर्षायाममा माथिल्लो भेगबाट बगेर आउने भेलले तराईमा बढी क्षति पु¥याउने गरेको तर्क उनीहरुले गरेका थिए ।
द स्मल अर्थ नेपाल(एसइएन) र कमला जलाधार संरक्षण अभियानको प्राविधिक सहयोगमा आयोजना गरिएको गोष्ठीमा इसीमोडका प्रतिनिधि शैलेन्द्र ढकाल र आयोजक संस्थाका कार्यकारी निर्देशक सुशिल ढकालले प्रस्तुतीकरण गरेका थिए ।
प्रस्तुतीकरणमा कमला नदीमा आउने बाढी र त्यसबाट हुने क्षतिको रोकथाम गर्ने विषयबारे चर्चा गरिएको थियो ।
बाढीका कारण सबैभन्दा बढी अचल सम्पत्तिमा क्षति पुग्ने गरेको तर्क विज्ञहरुको थियो ।
पूर्ण रूपमा नखाँदिएको, खुकुलो पत्रे चट्टान भएको र महाभारतबाट बग्ने नदीहरू यही चुरे क्षेत्र भई तराईतर्फ जाने हुँदा प्राकृतिक रूपले यो क्षेत्र संवेदनशील मानिएको छ । । मनसुनमा ठूलो वर्षाका कारण यो क्षेत्रमा बढी भू–स्खलन हुन्छ । जसका कारण बाढी उर्लिने र चुरेको तल्लो क्षेत्रमा रहेका तराई–मधेश डुबानमा पर्ने गरेको उनीहरुको भनाई थियो ।
तराई–मधेशका नदी किनारका घरहरू बाढीका दृष्टिकोणले जोखिममा छन् । १४ हजार २ सय ४४ घर उच्च जोखिम र ६६ हजार ५ सय २३ घर संवेदनशील क्षेत्रमा रहेको छ ।
गोष्ठीमा सामुदायिक विकास तथा पैरबी मंच नेपालका अध्यक्ष नागदेव यादव, कमला जलआधार संरक्षण अभियानका अभियन्ता विक्रम यादव लगायतले आ आप्नो धारणा राखेका थिए ।
