जनकपुरधाम । धनुषाधाममा आइतबार(आज)देखि मकर मेला सुरु भएको छ ।
धनुषधामको मकर मेला माघ महिनाको प्रत्येक आइतबार लाग्ने गरेको छ ।
मकर मेलामा धनुषा, महोत्तरी, सिराहा, सप्तरी, सिन्धुली तथा सीमावर्ती भारतीय क्षेत्रका श्रद्धालु भक्तजनहरु धनुषाधाम जाने गरेका छन् ।
ऐतिहासिक एवम् पौरानिक महत्व बोकेको धनुषाधाममा त्रेता युगमा भगवान् श्रीरामले शिवको पिनाक धनुष तोड्दा तीन टुक्रा भएको र त्यस मध्ये एक टुक्रा आकाश, अर्को पाताल तथा तेस्रो टुक्रा धनुषाधाममा खसेको धार्मिक मान्यता रहेको छ ।
भगवान् शिवको पवित्र पिनाक धनुष भएका कारणले सो ठाउँमा मकर अवधि भरि ठुलो धार्मिक मेला लाग्ने गरेको छ । धनुषाधाम मन्दिरमा भगवान् शिवको पिनाक धनुषको पूजापाठ गरी भाकल गरेमा मनोवाञ्छित फल प्राप्ती हुने जनविश्वास रहेको छ ।
धनुषाधाम मन्दिरमा अरू दिन पनि भक्तजनहरू आउने गरेको भए पनि अन्य दिन कम मात्रामा आउने गरेको मन्दिरका पूजारी स्वामी भरत गिरीले बताए । धनुषाधाम मन्दिरमा करिब १ हजार वर्ष पुरानो पिपलको रुख रहेको बताइन्छ । केही वर्ष यता धनुषाधाम मेलाको व्यवस्थापनको जिम्मा स्थानीय सरकारले लिएको छ । मेला व्यवस्थापनबाट वर्षेनी नगरपालिकाले लाखौ रुपैयाँ आम्दानी गर्दैै आएको छ ।
