जनकपुरधाम । संसदीय दलको नेतामा अभिराम शर्मालाई चयन गर्न लोकतान्त्रिक समाजवादी पार्टी(लोसपा) का पाँच जना प्रदेश सांसदहरुले प्रस्ताव गरेका छन् । मंगलबार पार्टी अध्यक्ष महन्थ ठाकुरलाई संसदीय दलको नेतामा शर्मालाई चयन गर्न उनीहरुले प्रस्ताव पेश गरेका हुन् ।
मधेश प्रदेशमा ९ जना सांसद रहेको लोसपाको पाँच जना सांसदको समर्थन पाएमा दलको नेता हुन्छ । पाँच जना सांसदको समर्थनमा दलको नेता शर्मालाई चयन गर्न प्रस्ताव पेश गरेको प्रदेशसभा सदस्य रानी तिवारीले बताइन् । बहुमत सांसदको समर्थनसहितको प्रस्ताव अध्यक्षज्यूसमक्ष प्रस्ताव गरेकी छु, उनले भनिन्–भोली(बुधबार) बिहानसम्म दलको नेताको घोषणा हुन्छ ।
अभिराम शर्मालाई दलको नेता बनाउन प्रस्तावमा महोत्तरीबाट निर्वाचित सांसद रानी तिवारी, सर्लाहीबाट निर्वाचित उपेन्द्र महतो, पर्साका रमेश प्रसाद कुर्मी र समानुपातिक सांसद रुपा कुमारी यादवको समर्थन छ ।
पार्टी अध्यक्ष महन्थ ठाकुरसमक्ष उनीहरुले शर्मालाई दलको नेता बनाउन प्रस्ताव गरेका हुन् । संसदीय दलको नेताका अर्का दावेदार पूर्वमन्त्री जीतेन्द्र सोनल लगायत चार जना सांसदले समर्थन गरेका छैनन् । आपूmहरुलाई प्रस्तावबारे केही जानकारी छैन्, प्रदेशसभा सदस्य जयनुल राईनले भने–आपूmहरुलाई बैठकको लागि बोलाए पछि जान्छु ।
बैठकको अगुवाई कसले गर्ने हो ? यसबारे स्पष्ट भइनसकेकोले आपूmखुशि संसदीय दलको नेता चयन नहुने उनको तर्क थियो । अध्यक्षज्यूको सहमति बिना दलको नेता चयन नहुने उनले भने । जीतेन्द्र सोनललाई महोत्तरीबाट निर्वाचित राईनसहित सिरहाबाट निर्वाचित रामबाबु यादव र समानुपातिक सांसद रमिता प्रधानको समर्थन छ । पार्टीको मधेश प्रदेश समिति समेत रहेका सोनलले लगातार दोश्रो पटक संसदीय दलको नेतामा दावी गरेपछि पाँच जना सांसद काठमाण्डौ पुगेर अध्यक्ष ठाकुरलाई प्रस्ताव बुझाएका हुन् ।
