जनकपुरधाम । धनुषामा हत्या आरोपमा मृतकका आफ्नै छोरा र ज्वाईँसहित तीनजना पक्राउ परेका छन् ।
धनुषाको मुखियापट्टी मुसरनिया गाउँपालिका–२ का धनुक दासको हत्या गरेको आरोपमा प्रहरीले उनका छोरा र ज्वाईसहित तीन जनालाई पक्राउ गरेर बुधबार सार्वजनिक गरेको छ ।
५० वर्षीय मोटर मिस्त्री दासको गत पुस ९ गते शनिबार साँझ आफ्नै ग्यारेजमा गोली प्रहार गरी हत्या गरिएको थियो ।
पक्राउ परेका मृतकका छोरा मुखियापट्टी मुसहरनियाँ २ का २१ वर्षीय प्रदीप दास, मृतकका ज्वाईँ प्रहरी प्रधान कार्यालयमा दरबन्दी भई मधेश प्रदेश प्रहरी कार्यालयमा कार्यरत्त प्रहरी हवलदार महोत्तरीको पिपरा गाउँपालिका–५ सहोडवाका ३४ वर्षीय उदय दास र सुटर नगराईन नगरपालिका २ जटहीका २१ वर्षीय रंजित कुमार यादवलाई सार्वजनिक गरेको छ ।
बहु विवाह गरेका धनुकका जेठी श्रीमतीका छोरा र ज्वाईँले घरायसी विवादमा ५ लाख रुपैयाँमा सुटर ल्याएर उनको हत्या गराएको प्रहरीबाट खुलेको हो ।
एडभान्सको रुपमा १ लाख र हत्या पश्चात पटक पटक गरी उनका ज्वाईँले २ लाख १० हजार सुटरलाई दिएका थिए भने बाँकी रकम डेढ महिनाभित्र दिने बताएका थिए ।
