जनकपुरधाम । मधेश प्रदेशमा तेश्रो ठूलो दल रहेको जनता समाजवादी पार्टी(जसपा) ले बिहीबार संसदीय दलको नेता चयन गर्ने भएको छ । संसदीय दलको नेता चयन गर्नको लागि जसपाका राष्ट्रिय अध्यक्ष उपेन्द्र यादव बुधबार जनकपुर आइपुगेका छन् । संसदीय दलको नेतामा तीन जनाले दावी गरेका छन् । मुख्यमन्त्री लालबाबु राउत, सभामुख समेत रहेका सरोज कुमार यादव र दलका उपनेता समेत रहेका नवनिर्वाचित प्रदेशसभा सदस्य रामअशिष यादवले नेतामा दावी गरेका हुन् ।
तीनै जना दलको नेता बन्न जोडबल गरेका छन् । बुधबार मात्रै जसपाले संघमा सर्वसम्मतले रामसहाय यादवलाई संसदीय दलको नेता चयन गरेको छ । प्रदेशमा भने आकांक्षी बढि देखिएको छ । २०७४ सालको निर्वाचनमा २९ सिट जितेर पहिलो दल बनेको जसपाले सर्वसम्मतले संसदीय दलको नेतामा मुख्यमन्त्री लालबाबु राउतलाई चयन गरेको थियो । उनले मुख्यमन्त्रीको रुपमा पाँच वर्ष सफलतापूर्वक प्रदेश संचालन गरेका छन् ।
सरोज कुमार यादवले पनि प्रदेशको सभामुखको रुपमा पाँच वर्षे कार्यकाल पूरा गर्न सफल भएका छन् । रामअशिष यादव पहिलो पाँच वर्षमा सरकारको पक्षमा लगातार प्रदेशसभामा भाग लिदै आएका सांसद हुन् ।
जसपाले प्रत्यक्षतर्पm जितेको ९ सांसदमध्ये ८ जना लगातार दोश्रो पटक प्रदेशसभा सदस्यमा निर्वाचित भएका छन् । पर्साबाट मुख्यमन्त्री लालबाबु राउत र सिंहासन सा कलवार, बाराबाट सभामुख सरोज यादव र बच्चालाल अहिर, रौतहटबाट फुलबाबु, सर्लाहीका संजय कुमार यादव, महोत्तरीका सरोज सिंह कुशवाहा र धनुषाका रामअशिष यादव प्रदेशसभामा दोहोरिएका नेता हुन् । सिरहाबाट निर्वाचित राजकुमार गुप्ता भने पहिलो पटक प्रदेशसभा प्रवेश गर्ने अवसर पाएका हुन् । समानुपातिकतर्पm निर्वाचित मनिष सुमन पनि लगातार दोश्रो पटक प्रदेशसभाको यात्रा तय गरेका हुन् । उनी यसअघि प्रत्यक्षबाट निर्वाचित भएका थिए । समानुपातिकतर्पm निर्वाचित अन्य ६ जना महिला सांसदहरु भने पहिलो पटक प्रदेशसभा प्रवेश गर्न लागेका हुन् ।
