जनकपुरधाम । मधेश प्रदेशसभाका नवनिर्वाचित सांसदहरूलाई ज्येष्ठ सदस्य शारदा शंकरप्रसाद कलवारले शपथ ग्रहण गराउने भएका छन् ।
संसद सचिवालयका सचिव रञ्जित यादवले ऐन, कानुन र संवैधानिक व्यवस्था अनुसार कलवारले प्रदेशसभाको ज्येष्ठ सदस्यको हैसियतले नवनिर्वाचित सांसदहरूलाई शपथ ग्रहण गराउने कार्यक्रम तय गरिएको बताएका हुन् ।
सचिव यादवका अनुसार प्रदेश प्रमुख हरिशंकर मिश्रले ज्येष्ठ सदस्य कलवारलाई शपथ ग्रहण गराएपछि मात्रै उनले अन्य प्रदेशसभा सदस्यहरूलाई शपथ गराउने छन् ।
उनले भने, ‘सर्वप्रथम ज्येष्ठ सदस्यलाई प्रदेश प्रमुखज्यूसँग शपथग्रहण गराउने कार्यक्रम छ । त्यसपछि सम्पूर्ण माननीय सदस्यज्यूहरूलाई हामी सूचना गर्नेछौँ । कानुनी प्रावधान निर्वाचन ऐनमा व्यवस्था भएअनुसार उपस्थित सांसदहरूमध्ये ज्येष्ठ सदस्यले शपथ ग्रहण गराउने भन्ने भएकाले कलवारमार्फत उहाँहरूलाई सपथग्रहण गराउने कार्यक्रम अगाडि बढाइनेछ ।’
सचिव यादवले ज्येष्ठताका आधारमा नेकपा एकीकृत समाजवादीका प्रदेशसभा सदस्य गोविन्दबहादुर न्यौपानेले शपथ गराउने तय भएपनि न्यौपाने अस्वस्थ रहेकोले शारदा शंकर कलवारले शपथ गराउने तयारी भएको बताए । न्यौपानेको उमेर ७१ वर्ष छ भने शारदा शंकरको उमेर ७० वर्ष रहेको छ ।
न्यौपाने नआउने भएपछि बारा २ को (१) बाट स्वतन्त्र निर्वाचित कलवारबाट नै ज्येष्ठ सदस्यको रुपमा शपथ ग्रहण गराउने कार्यक्रम तय गरिएको संसद सचिवालयले स्पष्ट पारेको छ ।
प्रदेशसभा सदस्यलाई शपथ ग्रहण गराउनेबारे अहिलेसम्म समय निश्चित नभएको उनले बताए । सचिवालयले अगामी आइतवार सर्वदलीय बैठक बोलाएको छ । सो बैठकबाट शपथ ग्रहणको मिति तय हुने उनले जानकारी दिए ।
गत मंसिर ४ गते सम्पन्न निर्वाचनबाट मधेस प्रदेशसभामा प्रत्यक्षतर्फ ६४ जना र समानुपातिकतर्फ ४३ जना गरी १०७ जना सांसदहरु निर्वाचित भएका छन् । उनीहरूलाई शपथ ग्रहण गराएपछि मात्रै संसदीय गतिविधि अघि बढाउनुपर्ने व्यवस्था रहेको पनि संसद सचिवालयले जनाएको छ । प्रदेशसभाको पहिलो कार्यकालको तुलनामा यसपटक दलहरूको अंकगणितमा फेरबदल भएको छ । यसपटक मधेस प्रदेशमा नेकपा एमाले, नेपाली कांग्रेस, जसपा, जनमत पार्टी, लोसपा, नेकपा माओवादी केन्द्र, नेकपा एकीकृत समाजवादी, राप्रपा, नेपाल संघीय समाजवादी पार्टी र नागरिक उन्मुक्ति पार्टीसहित १० वटा दलको प्रतिनिधित्व छ ।
यसअघिको कार्यकालमा जसपा पहिलो, नेपाली कांग्रेस दोस्रो, लोसपा तेस्रो, नेकपा एकीकृत समाजवादी पार्टी चौथो, नेकपा एमाले र नेकपा माओवादी पाँचौ दलको रुपमा थियो ।
