जनकपुरधाम । भगवान श्रीराम र सीता बीच बैबाहिक कार्यक्रम गरेर सोमबार (आज) सीताराम विवाह पञ्चमी महोत्सव मनाईदै छ ।
सोमबार दिउँसो रंगभूमि बारहविग्हा मैदानमा भगवान श्रीराम र सीताबीच स्वयम्बर कार्यक्रम सम्पन्न भएपछि साँझ मिथिला परम्परा अनुसार बैबाहिक कार्यक्रम गरिने भएको छ । बैबाहिक कार्यक्रमको लागि जानकी मन्दिरलाई बेहुली भैm सिंगारिएको छ । बैबाहिक कार्यक्रम जानकी मन्दिर परिसरमा सम्पन्न हुनेछ । बैबाहिक कार्यक्रममा भगवान श्रीरामको अभिभावक अर्थात राजा दशरथको भूमिकामा राममन्दिरका महन्थ राम गिरी र सीताको अभिभावक अर्थात राजा जनकको भूमिकामा जानकी मन्दिरका महन्थ रामतपेश्वर दास वैष्णव रहने गरेका छन् । सो अवसरमा धनुषाका अधिकारीसहित राजनीतिक दलका नेता, श्रद्धालुभक्तजनको उल्लेख्य उपस्थिति रहने गरेको छ ।
यसअघि आइतबार विवाहमहोत्सव अन्तर्गत मटकोर विधि गरिएको छ । जानकी मन्दिरबाट माता जानकीको स्वरूपलाई कलात्मक रथमा राखेर नेपाली सेनाको व्याण्ड र बाँजा गाँजासहित सुरक्षाकर्मीहरूको सुरक्षा घेरामा जनकपुरधामको प्रसिद्ध गंगासागरमा माटो खनेर मटकोर विधि गरिएको छ ।
गंगासागरमा आयोजना गरिएको मटकोर विधिमा जानकी मन्दिरबाट साधु सन्त, महन्थ, योगी, सन्यासी, भिक्षु भिक्षुणी तथा ठूलो सङ्ख्यामा भक्तजनहरूको सहभागिता रहेको छ । मटकोर विधिमा दिउँसै सेभ हिस्टोरिकल जनकपुरधामद्वारा गंगा आरतीको आयोजना गरिएको छ ।
मटकोर विधिमा महिलाहरूले विभिन्न प्रकारका परम्परागत सांस्कृतिक गीतहरू पनि गाएका थिए । मटकोर विधि हेर्नका लागि गंगासागर क्षेत्रमा ठूलो सङ्ख्यामा भक्तजनहरूको सहभागिता रहेको थियो ।
मटकोर विधिमा उत्खनन् गरेर ल्याएको माटोलाई जानकी मन्दिरमा निर्माण गरिने विवाहको मण्डपमा बनाइने विवाहको बेदीमा प्रयोग गरिने चलन रहेको छ ।
सप्ताहव्यापी विवाह पञ्चमी अन्तर्गत मंसिर १३ गते रामकलेवा रहेको छ । रामकलेवामा भारतबाट आएका जन्ती तथा सरीयातीहरुलाई राखेर प्रसादको रुपमा भोजन गराउने चलन रहेको छ । सोही दिन जन्तीहरूलाई बिदाइ गर्ने चलन रहेको छ ।
यता, सीताराम विवाह पञ्चमी महामहोत्सवको अवसरमा मधेश प्रदेश सरकारले सोमबार सार्वजनिक बिदा दिएको छ ।
मधेश प्रदेशका मुख्यमन्त्री लालबाबु राउतले आइतबार एक शुभकामना सन्देश जारी गर्दै विवाह पञ्चमीको अवसरमा सोमबार प्रदेशभरि सार्वजनिक बिदा रहेको जानकारी दिएका छन् ।
सप्ताहव्यापी रुपमा जनकपुरमा धुमधामसित मनाइने सीताराम विवाह पञ्चमीको भोलि मुख्य दिन रहेकाले प्रदेश सरकारले विगत वर्ष जस्तै बिदा दिएको छ ।
