जनकपुरधाम । धनुषा–२ को मतगणनामा धाँधली भएको आरोप लगाउँदै नेकपा एमालेले शनिबार जनकपुरमा प्रदर्शन गरेको छ ।
धनुषा–२ का निर्वाचन अधिकृत धर्मअवतार कोइरालामाथि कारबाहीको माग गर्दै नेकपा एमालेका उम्मेदवार उमाशंकर अरगरियाको नेतृत्वमा प्रदर्शन गरिएको हो ।
एमाले उम्मेदवार अरगरिया र उनका समर्थकहरूले जनकपुरधाममा प्रदर्शन गरेका हुन् । प्रदर्शनका क्रममा उनीहरूले निर्वाचन अधिकृत कोइरालालाई कारबाही गर, अर्को बाकसमा खसेको सदर मत गणना गर, आयोगको निर्देशिका बमोजिम मत गणना गर, षड्यन्त्रकारी प्रहरी प्रशासन मुर्दावाद जस्ता नारा लगाएका छन् ।
उम्मेदवार अरगरियाले प्रदेशसभाको बाकसमा खसेको करिब ४ सय सदर मत गणना नगरी परिणाम घोषणा गरी आफूलाई षड्यन्त्रपूर्वक पराजित गरेको आरोप लगाएका छन् ।
उनले भने, ‘५ मतले म अगाडी थिए । तर आधा घण्टामै १६ वटा वडाको मतगणना सकाएर हतार हतार परिणाम घोषणा गर्ने काम मुख्य निर्वाचन अधिकृतले गरे । म विरुद्ध ठूलो षड्यन्त्र भयो । यस विरूद्ध म सडकसँगै कानूनी लडाई लड्छु ।’
जनताको मत आफू निर्वाचन भएको उल्लेख गर्दै उनले सर्टिफिकेट दिँदैमा कोही सांसद नहुने बताए ।
उनले निष्पक्ष तरिकाले पुनः मतगणना गर्न पनि माग गरेका छन् ।
मुख्य निर्वाचन अधिकृत कोइरालाले कुन मतदान केन्द्रमा कति मत खसेको र कति मत गणना भएको सूचना पनि दिन नमानेको उम्मेदवार अरगरियाको गुनासो छ । शुक्रबार बिहान सार्वजनिक गरिएको धनुषा–२ को अन्तिम मतपरिणाम अनुसार नेपाली कांग्रेसका उम्मेदवार रामकृष्ण यादव १५७ मतले विजयी भएको थियो ।
