जनकपुरधाम । धनुषा २ को प्रतिनिधिसभा सदस्य पदमा सत्तारुढ गठबन्धनबाट नेपाली कांग्रेसका रामकृष्ण यादव निर्वाचित भएका छन् । उनले नेकपा (एमाले)का उमाशङ्कर अरगरियाभन्दा एक सय ५७ मत बढी ल्याएर निर्वाचित भएका हुन् ।
निर्वाचन आयोगका अनुसार कांग्रेसका नेता यादवले २० हजार एक सय १२ मत प्राप्त गरेका छन् भने एमालेका अरगरियाले १९ हजार नौ सय ५५ मत ल्याएका हुन् । त्यस्तै नेकपा (एकीकृत समाजवादी)का पूर्वमन्त्री रामचन्द्र झाले १३ हजार छ सय पाँच मत प्राप्त गरे ।
जनता समाजवादी पार्टी (जसपा)नेपालका गङ्गाराम यादवले १२ हजार नौ सय एक मत प्राप्त गरेका छन् भने जनमत पार्टीका जयनारायण साहले नौ हजार नौ सय ९२ मत प्राप्त गरेका हुन् ।
नवनिर्वाचित यादव विसं २०६४ र २०७० को पहिलो र दोस्रो संविधानसभा निर्वाचनमा साविकको निर्वाचन क्षेत्र नं २ बाट निर्वाचित भएका थिए । यादवले नौ महिना कृषिमन्त्री रहेका बेला कृषिमा आधुनिकीकरण गर्न सिँचाइका लागि धनुषामा प्रत्येक किसानको खेतमा सानो सेलोट्युबेल जडान गराएका थिए । त्यस्तै किसानका लागि प्रधानमन्त्री कार्यक्रमअन्तर्गत धानजोन र मत्सय जोन कार्यक्रम ल्याएका थिए । २०७४ सालको चुनावमा तत्कालीन संघीय समाजवादी पार्टीका उम्मेदवार उमाशंकर यादवसित उनी फराकिलो मतअन्तरले पराजित भएका थिए ।
यता, झिनो मतअन्तरले पराजयको सामना गरेका नेकपा एमालेका उम्मेदवार अरगरियाले मतगणनामा धांधली भएको आरोप लगाएका छन् । निर्वाचन अधिकृतको कार्यालय र प्रशासनले नेपाली कांग्रेसलाई जिताएको आरोप लगाएका हुन् । शुक्रबार जनकपुरमा पत्रकार सम्मेलन गरेर उनले निर्वाचनमा खटिएका अधिकृतसहित प्रशासनमाथि कारबाहीको माग समेत गरेका हुन् । उनले आपूmलाई जनताले मत दिएपनि प्रशासनले पराजित गरेको भन्दै पुनः मतगणनाको माग समेत गरे ।
