जनकपुरधाम । पाकिस्तानलाई पाँच विकेटले पराजित गर्दै इंग्लैण्डले दोश्रो पटक टी–२० क्रिकेट विश्वकपको उपाधि जितेको छ । अलराउण्डर बेन स्टोक्सको सहासी प्रदर्शनको मद्दतले इंग्ल्यान्डले पाकिस्तानलाई पाँच विकेटले पराजित गर्दै आइतबार टी–२० विश्वकप जितेको हो । यसअघि सन् २०१० मा पनि इंग्लैण्डले टी–२० क्रिकेट विश्वकप जितेको थियो । इंग्ल्यान्ड वन डे विश्वकपको पनि च्याम्पियन हो ।
मेलबर्न क्रिकेट मैदानमा जितका लागि १ सय ३८ रनको लक्ष्य पाएको इंग्ल्यान्डले १९ ओभरमा पाँच विकेट गुमाएर विजयी रन बनायो । स्टोक्सले दबाबको स्थितिमा ५२ रन बनाउँदै नटआउट रहे । ट्वान्टी–२० क्रिकेटमा उनको यो पहिलो अर्धशतक हो । उनलाई मोइन अलिले बलियो साथ दिए र उनले महत्वपूर्ण १९ रन बनाए । त्यसअघि कप्तान जस बटलरलले २६ रन बनाएका थिए ।
पाकिस्तानी बलर शाहिन शाह अफ्रिदी चोटका कारण मैदान छाड्न बाध्य रहेपछि खेल इंग्ल्यान्डको पक्षमा मोडिएको हो । इंग्ल्यान्डले टस जितेर पहिले फिल्डिङको निर्णय गरेको थियो । त्यस क्रममा उसले कसिलो बलिङ तथा सटिक फिल्डिङको मद्दतले पाकिस्तानलाई २० ओभरमा आठ विकेट गुमाएर १ सय ३७ रनमा रोकेको थियो ।
पाकिस्तानका लागि सन मसुदले ३८ रन बनाए र यो नै व्यक्तिगत उच्च स्कोर रह्यो । यस्तै कप्तान बाबर आजमले ३२ तथा सादब खानले २० रन बनाए । पाकिस्तानले नियमित अन्तरमा विकेट गुमाएपछि चुनौतीपूर्ण स्कोर खडा गर्न सकेन । इंग्लिस बलरमध्ये साम करन सबैभन्दा सफल रहे र उनले १२ रनमा तीन विकेट लिए । यस्तै अदिल रसिद र क्रिस जोर्डनले दुई दुई विकेट हात पारे ।
