जनकपुरधाम । जनकपुरधाममा फुटपाथ व्यवसायी र नगरप्रहरीबीच शुक्रबार झडप भएको छ ।
जानकीचोकमा सडकमा लगाएको ठेला हटाउने विषयमा विवाद हुँदा फुटपाथ व्यवसायी र नगर प्रहरीबीच झडप भएको हो ।
कृष्णाजन्माष्टमी मेलाका लागि पूजा सामग्रीहरू बेच्न सडक छेउमा फुटपाथ व्यापारीले लगाएको ठेला हटाउन नगर प्रहरीले बल प्रयोग गरेको र सोही क्रममा व्यापारी र नगरप्रहरीबीच झडप भएको स्थानीयहरुले बताए ।
नगरप्रहरीले बल प्रयोग गरेको देख्दा स्थानीय युवाहरू पनि आक्रोशित भएका थिए । ठेला हटाउने विषयलाई लिएर व्यवसायी र नगर प्रहरी बीच सुरु भएको भनाभन झडपमा परिणत भएको थियो । नगरप्रहरीले फुटपाथ व्यवसायीमाथि नगर प्रहरीले बल प्रयोग गरेको आरोप लगाइएको छ । नगर प्रहरीले स्थानीय एक ६ वर्षीय बालकमाथि समेत लाठी प्रहार गरेको बताइएको छ ।
झडप भएको खबरपछि जिल्ला प्रहरी कार्यालय धनुषाबाट गएको प्रहरी टोलीले जानकी चोकका किशन मण्डल, कन्हैया दास, सुभाष साह, सोनु साहलगायत ९ जनालाई नियन्त्रणमा लिएको हो ।
जनकपुरधाम उपमहानगरले फुटपाथ खाली गराएपनि व्यववस्थापन नगरेको भन्दै व्यवसायीहरु आन्दोलनमा छन् । फुटपाथको सडक खाली गराइएपनि ती क्षेत्रमा व्यापार गर्दै आएका व्यापारीलाई जनकपुरधाम उपमहानगरपालिको हालसम्म व्यवस्थापन गर्न सकेको छैन् । जानकी मन्दिर वरपरबाट हटाएपछि उनीहरु जानकी मन्दिर परिसरमा व्यापार थालेका थिए । तर, त्याहाँबाट पनि हटाइएपछि अहिले उनीहरुको व्यापार ठप्प छ । व्यापार ठप्प हुँदा दैनिक जीवनयापन समेत प्रभावित भएको व्यापारीहरु बताउँछन् ।
जनकपुरधामको जानकीचोकमा सडकमा लगाएको ठेला हटाउने विषयमा विवाद हुँदा नगर प्रहरीले बल प्रयोग गरेको उनीहरुको आरोप छ ।
यसअघि जानकी मन्दिर आसपासका फुटपाथ व्यापारीहरूले जनकपुरधामका नगरप्रमुखविरुद्ध विरोध प्रदर्शन गर्नुका साथै बिहीबार उपमहानगरको कार्यालय समेत घेराउ गरेका थिए ।
फुटपाथ खाली गरेको हप्तौं बिते पनि उपमहानगरले कुनै व्यवस्थापन नगरेको उनीहरूको गुनासो छ । साना तथा खुद्रा पसल थापेर व्यापार गरी जीविकोपार्जन गर्दै आए पनि आफूहरूको समस्याप्रति नगरप्रमुख मनोजकुमार साह गम्भीर नबनेको उनीहरूको आरोप छ । फुटपाथ व्यवसाय हटाएपछि जानकी मन्दिर परिसर र वरपरका क्षेत्र व्यवस्थित देखिएको छ । जानकी मन्दिरमा दर्शन पूजा गर्न जानेलाई सहज भएको छ । तर, वर्षौदेखि त्याहाँ पूजा सामग्रीको व्यापार गरेर जीवनयापन गर्दै आएका व्यापारीहरुको व्यवस्थापन नहुँदा उनीहरुको विजोग भएको छ ।
